Ron na wok bilong sios i mas igo strong long bringim senis insait long kantri Print
User Rating: / 0
PoorBest 
Written by Warime Guti   
Sunday, 11 January 2009 00:00

By Xavier Winia

Dispela em i namba wan hap tok Kinot spika bilong bung na Praim Minista bilong Papua Niugini Rt Honourable Grand Sif Se Michael Thomas Somare i mekim long ol manmeri namba olsem 5,000 na moa long taim bilong opim namba 27th Synod bilong Evenjelikol Luteran Sios bilong Papua Niugini (ELC-PNG) long Sande namba 10th de bilong mun Jenueri 2010. As tingting bilong dispela tok em kantri i bungim planti heve na sosol problem i wok long kamap strong insait long kantri bilong PNG we gavman luksave olsem sios tasol inap long kirapim gutpela pasin bilong wanbel na wokbung insait long ol pipol long ples level we han bilong gavman ino inap igo insait. Em i mekim tok tu long sios imas nau lukluk long wok bung (Partenship) wantaim gavman bilong wanem Somare-Temu gavman i nau lukluk long wok klostu wantaim praivet sekta aninit long State-Church Patnasip program bilong gavman bilong em.

Grand Sif i tok “bipo Ikonomi na moni mak o GDP mak i ibin stap daunbilo stret na rot bilong gavman long wokbung wantaim ol praivet na kamapim gut ol sevis ino bin stap strong tasol insait long dispela yia we bikpela ol project i wok long kamap insait long kantri, GDP or moni mak i nau ron strong na gavman bilong mi i nau redi long wok patnasip wantaim praivet sekta.” Insait long dispela Praim Minista i mekim bikpela tok tenkyu tu igo long Luteran sios na ol manmeri long wanem ol bikpela wok divelopmen sios i wok long kamapim insait long kantri olsem ol haus marasing, (health), skul (education), sip sevises (shipping services). Em i tok moa olsem long kamapim bikpela skul olsem univesiti em ino hatwok tasol hevi em i stap long mama lo bilong sios. Mama lo bilong sios i nogat toktok bilong kain skul. Na tu gavman ino bin mekim sampela tok long dispela bilong wanem mama lo bilong Luteran sios yet i nogat toktok bilong kamapim dispela kain skul. Tasol sapos sios i senisim (amend) mama lo na tok klia long dispela bai gavman iken lukluk long en. Long pinisim tok, Praim Minista i mekim wanpela apil igo long ol bikpela sios olsem Luteran, Catholic na United sios long mekim hap graun bilong ol we istap nating ples klia (available) long gavman i ken kisim long bringim divelopmen na sevis igo long ol pipol. Em i mekim dispela toktok bihainim wanpela bikpela hevi bilong graun we gavman i wok long bungim na gavman i luksave olsem ol dispela bikpela sios igat ol bikpela hap graun stap nating. Namba 27th Sinot bilong ELC-PNG i stat long taim olsem ten kilok long moning na pinis long tri kilok long apinun. Insait long dispela bung olgeta lida man bilong Morobe insait long Palimen i kamap long witnesim opening bilong Sinot. Ol arapela biklain delegets bilong Praim Minista husait ibin kam em gavana bilong Madang Sir Anold Amet, Internal Sikiriti Minista Sani Rambi, Riginol polis komanda bilong Momase Giosi Labi, Minista bilong difens Hon. Bob Dadae, Minista bilong Helt Hon. Sasa Zibe na ol arapela tu bin kamap long bung. Em i wanpela pes taim insait long histiri bilong ELC-PNG long wanpela Praim Minista bilong kantri long kamap long kain bung bilong sios na sios i mekim bikpela tok tenkyu tu long gavman long igat dispela pasin redi na luksave stap long wok klostu wantaim sios.

Comments (0)